ᑐᙵᓱᒋᑦᑎ ᑎᑭᕋᕐᔪᐊᕐᒧᑦ, ᐃᓄᐃᑦ ᐱᖅᑯᓯᑐᖃᖏᑦᑎᒍᑦ ᓄᓈᓕᐊᓛᖑᔪ ᑲᔾᔮᕐᓇᖅᑐᒦᖢᓂ ᑭᕙᓪᓕᕐᒥᑦ ᑲᓇᑕᐅᑉ ᐅᑭᐅᖅᑕᖅᑐᖓᓂᑦ. ᐊᒃᑐᖅᓯᒪᙱᑦᑐᑦ ᓴᓗᒪᔪᑦ ᖃᐃᖅᑐᖏᑦ, ᓯᒡᔭᐃᑦ, ᐊᒪᓗ ᐊᒥᓱᐃᑦ ᑕᓰᑦ ᑰᓪᓗ, ᐃᓄᐃᑦ ᐱᖅᑯᓯᕆᔭᖏᑦ ᓇᓂᓗᒃᑖᖅᑐᑦ.
ᑎᑭᕋᕐᔪᐊᖅ ᑕᓯᐅᔭᕐᔪᐊᑉ ᓯᒡᔭᖓᑕ ᐱᖓᖕᓇᖅᐸᓯᖓᓃᑐᖅ, ᐊᕐᕕᐊᑦ ᐅᐊᖕᓇᖓᓂᑦ ᐊᒪᓗ ᓂᒋᐊᓃᖢᓂ ᑭᕙᓪᓕᕐᒥᑦ ᑐᕌᖅᑕᕐᕕᐅᓛᖑᔫᑉ ᑲᖏᖅᖠᓂᐅᑉ. ᖃᑉᓗᓈᑎᑐᑦ ᐊᑎᖃᕈᑎᖓ ᐊᒥᓱᓄᑦ ᕿᓇᓗᒐᓄᑦ ᑲᑎᕝᕕᐅᖃᑦᑕᕐᒪᑦ ᖃᓂᑦᑐᖅ ᐅᑭᐊᒃᓵᑕᒫᑦ. ᓄᓇᓕᒃ ᖃᐅᔨᒪᔭᐅᔪᖅ ᑎᑭᕋᕐᔪᐊᖅ-ᒥᒃ, ᑐᑭᖃᖅᑐᖅ “ᓄᕗᒃ ᑕᑭᔪᖅ ᐊᕙᓗᔭᐅᓯᒪᑉᓗᓂ ᐃᒪᕐᒧᑦ” ᐅᕙᓘᓃᑦ ᐃᓄᒃᑎᑐᑦ ᐊᑎᖓ “ᓄᓇ ᐊᒥᓱᓄᑦ ᑲᑦᑎᕝᕕᐅᓲᖅ”-ᒥᑦ, ᐃᓄᐃᑦ ᐅᖃᐅᓯᖓᑦᑎᒍᑦ. ᓇᓗᓇᐃᑯᑕᖅ ᕿᓇᓗᒐᐅᑉ ᐸᒥᐅᖓ, ᓴᓇᔭᐅᓚᐅᖅᓯᒪᔪᖅ 1967-ᒥᑦ, ᖁᑦᑎᒃᑐᒦᑐᑦ ᓄᓇᓕᖕᒧᑦ ᑕᑯᒃᓴᐅᑉᓗᓂ ᐊᒪᓗ ᑐᑭᖃᖅᑐᖅ ᐱᖅᑯᓯᑐᖃᖏᑦ ᐱᒻᒪᕆᐅᒋᔭᐅᓂᖓᓄᑦ.
ᐅᑉᓗᒥᐅᔪᖅ, ᑎᑭᕋᕐᔪᐊᕐᒥᑦ ᐃᓄᐃᑦ ᐃᓕᖅᑯᓯᖏᓐᓂᒃ ᐊᑐᖃᑦᑕᖅᑐᑦ ᓱᓕ. ᐱᓱᓗᕋᖅᖢᓂ ᓄᓇᓕᖕᒥᑦ ᑕᑯᔪᖕᓇᖅᑐᑎᑦ ᐃᓄᐃᑦ ᐊᑐᖅᑐᑦ ᐃᓄᐃᑦ ᐊᓐᓄᕌᓕᐊᕆᕙᒃᑕᑐᖃᖏᓐᓂᒃ, ᓴᓇᙳᐊᖅᑐᑦ ᓴᐅᓂᕐᓂᒃ, ᓇᒡᔪᓂᒃ, ᐅᒃᑯᓯᒃᓴᒥᒡᓘᓃᑦ, ᐊᒪᓗ ᒥᖅᓱᖅᑐᑦ ᐊᓐᓄᕌᓃᒃ ᓂᕐᔪᑏᑦ ᕿᓯᖏᓐᓂᒃ. ᐅᑭᐅᓗᒃᑖᖅ 427 ᓄᓇᓕᖕᒥᐅᖑᔪᓄᑦ ᖃᓄᐃᓕᐅᕐᓂᖅᑕᖃᖃᑦᑕᖅᑐᖅ. ᐄᐳᕆ-ᒥᑦ ᔫᓂ-ᒧᑦ, ᑕᑯᔪᖕᓇᖅᑐᑎᑦ ᑎᑭᕋᕐᔪᐊᕐᒥᐅᑕᓂᒃ ᐊᒥᓱᓂᒃ ᖃᓂᑦᑐᓂᒃ ᑕᓯᕐᓂᒃ ᑰᖕᓂᓪᓗ ᐃᖃᓪᓕᐊᒎᒃᑐᓂᒃ ᓄᒡᓗᓪᓗᐊᓛᖑᓇᓱᒃᑐᑦ ᐊᖏᓛᒥᒃ ᐃᖣᕐᓗᑎᒃ ᐊᒪᓗ ᓄᓇᕐᔪᐊᒥᑦ ᖃᐅᔨᒪᔭᐅᔪᖅ ᐃᖃᓗᒃᐱᖕᓂᒃ. ᐊᕐᕌᒍᑕᒫᑦ ᐃᖃᓗᒡᔪᐊᖅᓯᐅᕐᓂᖅ ᐱᖅᑯᓯᕆᔭᐅᔪᖅ ᐃᓄᖕᓂᒃ ᓇᑭᑐᐃᓐᓈᖅᑐᓂᒃ ᑭᕙᓪᓕᐅᑉ ᓄᓇᓕᖏᓐᓂᑦ ᑎᑭᑎᑦᑎᖃᑦᑕᖅᖢᓂ ᐊᖏᓛᒥᒃ ᐃᖃᓗᒐᓱᒋᐊᖅᑐᖅᑐᓂᒃ. ᔫᓂ-ᒥᑦ ᐋᒐᓯᒧᑦ ᐊᒥᓱᑦ ᖃᑕᙳᑎᒌᑦ ᐊᑑᑎᖃᖃᑦᑕᖅᑐᑦ ᖃᐅᒪᒐᔪᖕᓂᖓᓂᒃ, ᓯᓂᒃᑕᕆᐊᖅᓯᒪᔪᑦ ᓄᓇᒥᑦ, ᒪᖃᐃᑐᑦ ᓇᑦᑎᕐᓂᒃ ᕿᓇᓗᒐᕐᓂᒡᓘᓃᑦ, ᓇᓗᒐᓛᕆᐊᖅᑐᖅᑐᓪᓘᓃᑦ [Old Water] ᑕᓯᕐᒧᑦ. ᐋᒐᓯᒥᑦ ᐆᒃᑑᐱᕆᒧᑦ, ᐊᒥᓱᑦ ᐊᕐᓇᐃᑦ ᐊᖅᐱᒃᑕᕆᐊᖃᑦᑕᖅᑐᑦ ᐸᐅᕐᖓᖅᑕᕆᐊᖃᑦᑕᖅᑐᓪᓘᓃᑦ, ᐊᒪᓗ ᔭᐸᓂᒃ ᓯᓚᐹᓂᒡᓗ ᒥᖅᓱᖅᖢᑎᒃ ᐅᑭᐅᒧᑦ ᐸᕐᓇᒃᐸᓪᓕᐊᔪᑦ.
ᐅᑭᐅᖑᑎᓪᓗᒍ, ᓄᓇᓕᖕᒥᑦ ᓂᕆᕕᒡᔪᐊᖕᓂᖅ, ᕿᑎᓐᓂᖅ, ᐃᓄᒃᑎᑐᑦ ᒧᒥᕐᓂᖅ ᐊᒪᓗ ᐊᓯᖏᓐᓂᒃ ᑲᑎᔾᔪᑎᖃᕐᓂᖅ ᓄᓇᓕᖕᒥᐅᖑᖃᑎᒌᒃᑎᑦᑎᖃᑦᑕᖅᑐᖅ ᖁᕕᐊᓱᒃᑎᖢᒋᓪᓗ.
ᑲᔾᔮᕐᓇᖅᑐᑦ ᑕᑯᔪᒥᓇᖅᑐᑦ ᑎᑭᕋᕐᔪᐊᑉ ᓯᓚᑖ. ᐱᓱᓗᕋᕐᓂᖅ ᓯᒡᔭᒥᑦ, ᐅᕙᓘᓃᑦ ᐅᑉᓗᐃᓈᕐᓗᓂ ᓄᓇᒧᑦ ᓂᕆᔭᖅᑐᖅᓯᒪᓂᖅ ᑎᖓᐅᔭᓕᖕᒥᑦ ᓄᓇᒥᑦ ᐅᕙᓘᓃᑦ ᖃᓂᑦᑐᒧᑦ ᑕᓯᕐᒧᑦ. ᐅᓐᓄᒃᑯᑦ ᑕᐅᑐᒃᖢᒋᑦ ᑕᖅᓴᓕᔮᑦ. ᐅᔾᔨᖅᑐᖃᑦᑕᖅᖢᑕ ᓂᕐᔪᑎᑕᖃᕆᐊᒃᓴᖓᓂᒃ – ᓯᒃᓰᑦ, ᐅᑲᓕᐊᕐᔪᐃᑦ, ᑎᕆᒐᓂᐊᑦ, ᑐᒃᑐᐃᑦ, ᐊᒪᕈᐃᑦ ᐊᒪᓗ ᓇᓄᐃᑦ ᑕᑯᔭᐅᒐᔪᒃᑑᔪᑦ ᓄᓇᓕᖕᒥᑦ ᖃᓂᑕᖓᓂᒡᓗ.
ᑎᑭᕋᕐᔪᐊᕐᒥᑦ ᐃᓕᓐᓂᐊᕐᕕᒃ, ᐋᓐᓂᐊᕐᕕᒃ, ᐳᑭᖅᑕᓖᑦ, ᕼᐋᒻᓚᒃᑯᑦ ᑎᑎᕋᕐᕕᖓᑦ, ᐱᙳᐊᕐᕕᒃ, ᑯᐊᐸᒃᑯᑦ, ᐊᒪᓗ ᓈᓚᒡᕕᐊᓛᖃᖅᑐᖅ. ᐃᖢᕐᕆᓗᑎᑦ ᐃᓴᑎᒃ ᓯᓂᒃᑕᕐᕕᖕᒦᓪᓗᑎᑦ ᓂᕆᑦᑎᐊᕐᓇᖅᖢᓂ ᐃᓄᐃᑦ ᓂᕿᖏᓐᓂᒃ ᐅᕙᓘᓃᑦ ᖃᑉᓗᓈᖅᑕᓂᒃ ᓂᕆᕝᕕᐊᓂᑦ. ᑐᒃᓯᕋᕐᓗᓂ ᑯᐊᐸᖕᒥᑦ ᐅᒡᓚᕋᖅᑎᐅᓂᕐᒧᑦ ᓇᒧᙵᐅᔾᔭᐅᕈᓘᔭᕈᒪᓂᕐᒧᑦ ᐊᐅᓚᕈᔾᔨᔪᖕᓇᖅᑐᓂᒡᓗ ᐅᕙᓘᓃᑦ ᐆᒪᔪᓕᕆᔨᐊᓛᑯᑎᒍᑦ. ᑐᙵᓇᖅᑐᑦ ᐃᓄᖁᑎᕗᑦ ᖁᕕᐊᓱᐃᓐᓇᖃᑦᑕᖅᑐᑦ ᑎᑭᕌᓂᒃ ᑕᑯᔭᕌᖓᑕ ᐃᑲᔪᕈᒪᐃᓐᓇᖅᐸᒃᖢᑎᒡᓗ ᓇᒧᙵᐅᔪᒪᔪᓂᒃ ᓄᓇᓕᒥᑦ. ᑎᖕᒥᓲᖅᑕᖃᖃᑦᑕᖅᑐᖅ ᒪᓐᑎᒥᑦ ᓴᓇᑦᑕᐃᓕᒧᑦ ᐅᐃᓂᐱᒡᒥᑦ ᑲᖏᖅᖠᓂᒃᑰᖅᖢᑎᒃ ᑳᒥᐊᑯᑦ ᕘᔅᑎᐊᑯᓪᓗ.
ᓂᕆᐅᑎᐊᖅᑐᒍᑦ ᑕᑯᔪᒪᑉᓗᑎᑦ!