ᐱᖁᑎᕐᔪᐊᑦ

ᑕᒪᐃᓂᒃ  ᐃᒡᓗᕐᔪᐊᑦ  ᑎᑭᕋᕐᔪᐊᕐᒥᑦ  ᐃᒥᖅᑕᕐᕕᐅᖃᑦᑕᖅᑐᑦ  ᐊᒪᓗ  ᖁᕐᕕᖕᒥᙶᖅᑐᑦ  ᑯᕕᖅᑕᖅᑕᐅᑉᓗᑎᒃ.  ᖃᐅᑕᒫᑦ,  ᓄᓇᒃᑰᕈᑏᑦ  ᐊᖏᕐᕋᕆᔭᐅᔪᓄᑦ,  ᐱᔅᓯᓂᓄᑦ,  ᐊᒪᓗ  ᐃᓄᖕᓄᑦ  ᑐᕌᖓᔪᓄᑦ  ᐃᒡᓗᕐᔪᐊᓄᙵᐅᖃᑦᑕᖅᑐᑦ  ᐊᒪᓗ  ᐃᒪᕐᒥᒃ  ᐊᒡᔭᖅᑐᐃᑉᓗᑎᒃ  ᒥᓗᑲᖅᑕᐅᑉᓗᑎᒡᓗ  ᖁᕐᕕᖕᒥᙶᖅᑐᑦ.  ᖁᕐᕕᖕᒥᙶᖅᑑᓯᕝᕖᑦ,  ᐊᖏᕐᕋᕆᔭᐅᔪᑦ  ᐃᒡᓗᕐᔪᐊᓘᓃᑦ  ᐊᑎᖏᓐᓃᒐᔪᒃᑐᑦ,  ᑯᕕᔭᐅᑉᓗᓂ  ᑯᕕᖅᑕᕐᕕᖕᒧᑦ  ᐊᑕᐅᓯᕐᒥᒃ  ᑭᓛᒥᑕᒥᒃ  ᐅᖓᓯᒃᑎᒋᔪᒧᑦ  ᓄᓇᓕᖕᒥᑦ.  ᐊᒃᑕᑯᐃᑦᑕᐅᖅ  ᐱᔭᐅᖃᑦᑕᕐᒥᔪᑦ  ᑕᒪᐃᓂᓗᒃᑖᖅ  ᓄᓇᖕᒦᑐᓂᑦ.  ᐃᒪᖅ  ᑯᕕᖅᑕᕐᕕᖕᓄᓪᓗ  ᐱᔨᑦᑎᕋᐃᓂᖅ  ᐃᑲᔪᖅᑕᐅᓂᖃᖅᑐᑦ  ᐊᖏᔪᒥᒃ  ᑮᓇᐅᔭᑎᒍᑦ  ᐊᑭᖏᑦ  ᐊᔪᕐᓇᒐᓚᒐᔭᕐᒪᑕ  ᐊᐅᓚᓪᓗᒋᑦ.

ᑎᑭᕋᕐᔪᐊᖅ  ᐅᑉᓗᒥᒨᓕᖓᔪᓂᒃ  ᐃᒡᓗᕐᔪᐊᖅᑕᖃᐅᖅᑐᖅ  ᐃᓚᐅᑉᓗᓂ  ᐃᓄᒡᓚᒃ  ᐃᓕᓐᓂᐊᕐᕕᒃ  120-ᓂᒃ  ᐃᓕᓐᓂᐊᖅᑎᑕᖃᖅᖢᓂ  ᐱᒋᐊᓵᖅᑐᓂᑦ  12-ᒧᑦ  ᖁᑦᑎᖕᓂᓕᖕᓄᑦ.  ᐳᑭᖅᑕᓕᒃᑕᖃᕆᑉᓗᓂ,  ᕼᐋᒥᓚᒃᑯᑦ  ᑎᑎᕋᕐᕕᖓᑦ,  ᕿᑎᒡᕕᒃ,  ᑯᐊᐸᒃᑯᑦ,  ᓯᓂᒃᑕᕐᕕᒃ  ᐊᒪᓗ  ᓈᓚᒡᕕᐊᓛᖅ.  ᑎᑭᕋᕐᔪᐊᑉ  ᒥᑦᑕᕐᕕᖓ  8  ᑭᓛᒥᑕᓂᒃ  ᓄᓇᓕᖕᒥᑦ  ᐅᖓᓯᒃᑎᒋᔪᖅ.

ᑎᑭᕋᕐᔪᐊᖅ  ᑎᑭᑕᐅᔪᖕᓇᖅᑐᖅ  ᑎᖕᒥᓲᑯᑐᐃᓐᓇᖅ  ᐅᒥᐊᑯᓪᓘᓃᑦ.  ᐅᒡᓚᖅᑐᑦ  ᑎᑭᑦᑐᖕᓇᖅᑐᑦ  ᐅᐃᓂᐲᒡᒥᑦ  ᑎᑭᕋᕐᔪᐊᕐᒧᑦ  ᑳᒥᐊᑯᑦ  ᕘᔅᑎᐊᑯᓪᓘᓃᑦ.  ᑎᖕᒥᓲᑦ  ᑎᑭᑦᑐᖅ  ᐊᐅᓚᖅᑎᖅᑐᓪᓗ  ᖃᐅᑕᒫᖑᖃᑦᑕᖅᑐᖅ  ᒪᓐᑎᒥᑦ  ᓴᓇᑦᑕᐃᓕᒧᑦ,  ᓯᓚ  ᖃᓄᐃᖏᑐᐊᖅᐸᑦ.